心情13——2012.11.20

     上一篇blog想記低嘅嘢重好清晰嘅浮現眼前，估唔到都經已係好幾個月之前嘅事la！

  啱啱睇完'溏心風暴'，真係好多感觸。作為一個資深tvb迷，竟然宜家先睇呢一部經典，我自己都覺得有d驚訝……

    其實以前唔多中意鐘嘉欣噶，但係，呢一段'常在心&程亮'嘅故仔真係打動到我噶！初初就好心酸，同自己暗戀咗好耐嘅人喺埋一齊，果種感覺真係好開心，但係兩個人要一齊，唔係凈係得鐘意就夠嘅啦。所以慢慢，兩個人開始成日嗌交。兩個人都一次次咁諗，大家係唔係真係啱喺埋一齊，但係又都捨不得大家。於是就陷入了一個惡性循環……到呢度，我就諗到自己，我同大花都係咁噶，呢排成日都吵，乜都可以嗌餐飽嘅，其實我都知佢實好唔開心嘅啦，但係，我真係控制唔到自己嘞，一次一次咁覺得好失望。講番部劇啦，好啦，程亮足知都做錯嘢啦，重好緊要果只，常在心覺得接受唔到，於是兩個分咗手。跟住就到最打動到我嘅一part啦，程亮開始寫日記，【沒有常在心的日子】，一日一日咁寫，每一次，佢都用心去感受常在心嘅感受，去瞭解佢。佢失去咗常在心之後，唔係乜都唔做，亦都唔係做埋d無謂嘢，而係，好卑心，真係好卑心去體會常在心嘅生活，佢終於都識得企鄉常在心嘅角度佢理解佢。可惜啊，結局太虐心，程亮死咗，最尾都冇聽到常在心話原諒佢。其實，人係唔係都係一樣嘅呢，都要等到失去之後先嚟識珍惜。程亮有句話我覺得好啱聽，'原來心情唔好嘅時候，唔係想搵老友出嚟傾訴，而係想寫d嘢'，將自己嘅心情寫嗮出嚟，第時睇到可能覺得好好笑tim，又唔駛煩住人，成日好似個怨婦咁，一路同人講男朋友有幾唔好。其實，我都會諗，大花有一日會唔會睇到呢d日誌呢？佢睇唔睇得明噶？佢又會有乜感受呢？   但係，我知道，唔會嘅！諗咁多做乜啊？佢連我嘅微博都唔會睇啊，又點會細心到發現到我呢一個blog啊~~~

    唔知係我變咗呢，定係我兩個其實真係好多問題，唔啱喺埋一齊。呢排，我成日都覺得佢達唔到我嘅要求。我知，佢經已好就住我嘅啦，所以咩顯得我好任性咁囖。但係，諗深D啊，就好似我要佢戒煙呢，唔係我要求噶，係佢自己話要戒，我監督佢嘅嘖。我唔知應該點理解，佢就真係好鍾意玩啦，但係，到咗宜家，我哋喺一齊經已443日，我都覺得佢冇“我哋”嘅慨念，乜都係自己一個人就決定。其實我真係好唔安心噶，我唔知道自己被擺咗響一個乜位置，佢嘅工作第一啦，同事又好重要喎，跟住就係遊戲啦，踢ball啦，飲酒啦……好多好多，每一次都係冇辦法嘅，每一次都要搵一個理由，我覺得好無稽嘅理由，每一次我嘅質問都變咗無理取鬧。其實初初我真係好理解噶，但係佢一次又一次，都覺得理所當然，呢個關係要處，果個關係又要维，咁我哋呢？大花啊，感情係需要经营噶！其實我都想做一個善解人意嘅女朋友ga，但次次關鍵時刻，你就一盆冷水潑落嚟，叫我點忍喎。我成日都覺得要點樣改變先可以等大家相處得融洽d，但係點解我一啲都睇唔到你有咁嘅想法呢？早幾日啊，我發脾氣，你竟然走咗去，知唔知我幾傷心啊！！！我唔知我當時點解可以做到搵番你返嚟，但係你真係hurt得我好緊要！我知發脾氣係我唔啱先噶，但係我發脾氣有原因嘅喎。你成日都話你同d異性朋友相處有分數，叫我信你！或者就話我，話我唔理解你，話我小家！喂，大佬啊，我都好想信噶，咁你一次次讓我失望，我點信喎，我又唔可以選擇性失憶，我哋係兩個人嚟噶，你都要企響我立場諗哈啊！點解凈係要我理解你喎！可能好多人唔明，咁咩同佢講囖，喺度寫咁多都冇用喎。兩個人相處就係咁嘅啦，如果由我講出呢d，佢都凈係會覺得我無理取鬧嘖，覺得我唔識諗囖，覺得我細佬女，所以我會等，等有一日你自己好似程亮咁，明白我哋之間係需要相互理解相互包容嘅。

    ''''但係，我等唔等得到果日呢……